Pato ciyaaryahan Mustaqbal leh

28.03.2008, deeyoo.com

Alexandre Pato oo weli 18 jir ah ayaa mar kale soo jiitay indhaha caalamnka markii uu gool qurux badan dhaliyey kulankiisii ugu horeeyey ee qaranka Brazil mar ay xulkiisa 1-0 ku dhufteen qaranka Swedan kulan saaxiibtinimo oo ka dhacay garoonka Arsenal ee Emirates.

Pato oo kulankaan bedel kusoo galay waxey ku qaadatey 12 daqiiqo oo keliya inuu dhaliyo goolkiisa ugu horeeyey ee xulka qaranka isagoo horena laf dhabar u ahaa xulka da`da yar (junyarka) Brazil ee ku guuleystey koobkii junyariska ee Latin America sanadkii hore.

Alexandre Rodrigues da Silva oo ku magac dheer  Pato waxa uu ku dhashay deegaanka  Pato Branco ee magaalada Parana isagoo lagu naaneesey magaaladii uu ku dhashay ee Pato, inkastoo weli uu ku jiro bilowga mustaqbalkiisa ciyaaraha hadana wuxuu ku guuleystey koobka kooxaha aduunka "Toyota Cup" oo ay kooxdiisa Internacional 1-0 finaalhii kaga badiyeen kooxda weyn ee Barcelona disembar 2006 xiligaas oo uu Pato ahaa 17 jir, isla tartankaas ayuu Pato bog cusub u furay mustaqbalkiisa ciyaaraha isagoo jabiyey iskoor uu Pele hore u heystey 48 sano oo ahaa ciyaaryahanka ugu da`da yar ee gool ka dhaliyo tartan caalami ah oo ay FIFA aqoonsantahay markii uu gool ka dhaliyey kooxda reer Masar ee AL-AHLY semifinaalhii tartankaas.

Tababaraha xulka Brazil Dunga ayaa kulankii Swedan ka dib sheegay inuu Pato soo xusuusinayo Ronaldo xiligii uu da`yaraa dhanka farsamada iyo weliba dhameystirka, marka aad fiirisid da`da Pato iyo guulaha uu gaaray bilowga mustaqbalkiisa ciyaaryahanimo ma aha wax lala yaabo in dad badan oo ciyaaraha ka faalooda ay ku mitaalaan Pato boqorka kubada cagta Pele ama Ronaldo oo ah ciyaaryahanka dhaliyey goolasha ugu badan ee ciyaaryahan ka dhaliyo tartanka koobka aduunka.

Mucjisada Pato
Marka laga soo tago orodkiisa, xirfadiisa iyo weliba dhameystirkiisa waxaa runtii laga sii arki karaa mucjisada Pato isagoo goolal ka dhaliyey kulankiisii ugu horeeyey ee kooxdiisii hore Internacional, kulankiisii ugu horeeyey ee junyarka Brazil, kulankiisii ugu horeeyey ee AC Milan iyo weliba kulankiisii ugu horeeyey ee xulka Brazil.

Ma aha wax lala yaabo in ciyaaryahan hada uun galey 18 sano uu boos ka xirto kooxda faca weyn ee Milan isagoo 6 gool oo serie A u dhaliyey Milan wixii ka dambeeyey Bishii Janaayo.

Pele, Zico, Ronaldo, Ronaldinho waxey u muuqataa in Pato uu saf la geli doono xidigaha reer Brazil iyadoo dadka aadka u taageerana ayba aamin sanyihiin in magaca Pato uu kusoo xigsan doono Pele inkastoo ay adag tahay in waayahan la arko ciyaaryahan ka wanaagsan Ronaldo.

Asad A. Omar "afey"

deeyoo_edit@hotmail.com

 
 Halkan riix si aad deeyoo.com uga dhigato bogga hore