Bayern Munich oo dirqi kaga baxsatey Getafe, Fiorentina, Rangers iyo Zenit oo ku wehliya semifinaalaha koobka UEFA.

Luca Toni oo gool dhaliyey daqiiqadii ugu dambeysey

11.04.2008, deeyoo.com

Getafe vs Bayern Munich 3-3(isku darka labada kulan 4-4) Bayern ayaa kusoo baxdey sharciga mudnaanta goolka banaanka

Luca Toni oo u safta kooxda weyn ee Jarmalka Bayern Munich ayaa u suura geliyey iney si dirqi ah ugu soo gudubtay semifinaalaha koobka UEFA markii uu 2 gool dhaliyey 5tii daqiiqo ee ugu dambeysey waqtigii dheeriga ahaa ee lagu darey markii 90kii daqiiqo ee ciyaarta mar kale ku dhamaatey 1-1 isagoo dilay rajadii Getafe oo 3dii daqiiqo ee ugu horeysey waqtigii lagu daray 2 gool dhalisey.

Getafe oo aad loo rumeysnaa ineysan sinaba u hor istaagi karin kooxda magaca leh ee Bayern Munich isla markaana bareejadii ay ku soo galeen Munich ay nasiib aheyd ayaa daqiiqadii 6aad ee bilowgii ciyaarta guduud laga siisey ciyaaryahan Ruben de la Red taasoo ceel dheer ku sii riday rajo laga qabay in Geatfe semifinaalaha soo gaarto hase yeeshee ciyaaryahan Contra ayaa gool koontaro ah u dhaliyey Getrafe dhamaadkii qeybtii hore ee ciyaarta iyadoo lagu kala nastey 1-0 oo ay Getafe ku hogaamineysay.

Franck Ribery ayaa Bayern ciyaarta kusoo celiyey markii uu gool u dhaliyey hal daqiiqo ka hor dhamaadkii ciyaarta, maadaama kulankii horena uu 1-1 ku dhamaadey si loo kala saaro waxaa lagu darey 30 daqiiqo oo dheeri ah taasoo markii ay bilaabateyba ay ciyaaryahanada Getafe oo hal qof la dheeraa ay sidii hirgii uga dul dheceen goolka Bayern iyagoo 3dii daqiiqo ee ugu horeyseyna ay laba gool u kala dhaliyeen Francisco Casquero iyo Braulio markaasoo taageerayaasha Getafe isa siiyeen guusha illaa 5tii daqiiqo ee ugu dambeysey uu ka jajabiyey Luca Tonni oo laba gool u dhaliyey Bayern.

Bayern waxey semifinaalaha isaga hor imaanayaa kooxda Ruushka ee Zenit oo 4-1 isku darka labada kulan ku dhufatey Bayern Leverkusen iyadoo kulanka kale ee semifinaalaha uu dhex mari doono kooxaha Fiorentina oo Talyaani ah iyoRangeres.

Fiorentina waxey 2-0 (isku darka labada kulan 3-1) uga soo talaabsatey kooxda PSV halka Rangers ay 2-0 ku suldaartey kooxda Portoqiiska ah ee Sporting Lisboa.

Kulamada wejiga hore ee semifinaalaha ayaa la ciyaarayaa 23ka Abril hadii Alle idmo.

Asad A. Omar "afey"

deeyoo_edit@hotmail.com

 
 Halkan riix si aad deeyoo.com uga dhigato bogga hore