Manchester United iyo Barcelona oo min hal lug la galay semifinaalaha Champions League

C.Ronaldo

02.04.2008, deeyoo.com

Manchester United ayaa hal lug la gashay semifinaalaha koobka weyn ee Chambions League markii ay 2-0 banaanka kaga soo badiyeen kooxda kaalinta 2aad kaga jirta horyaalka Talyaaniga ee Roma.

C.Ronaldo oo la rumeysan yahay in waqti xaadirkaan uu yahay ciyaaryahanka ugu wanaagsan aduunka ayaa goolkii hore madax ku dhaliyey 5 daqiiqo ka hor dhamaadkii qeybtii hore halka Rooney Weyne uu goolkii 2aad u dhaliyey kooxdiisa bartamihii qeybtii 2aad, guushaan ayaa ah markii ugu horeysey oo ay Man.United banaanka kaga soo badiso Roma.

Difaaca Roma ayaa u muuqdey ciyaarta bilowgeedii iney qariyeen Ronaldo oo aan la arkin qeybtii hore oo dhan hase yeeshee wuxuu tusay inuu u baahan yahay hal fursad keliya si uu u noqdo farqiga u dhexeeya labada koox.

Roma ayaa qeybtii dambe aad uga ciyaar wanaagsaneyd Man.United hase yeeshee waxey ku guul dareysteen iney ka faa`iideystaan fursadihii badnaa ee soo maray taasoo ciqaabteedana ay noqotey in iyaga laga dhaliyo gool koontaro ah oo niyad jab ku riday wixii markaas ka dambeeyeyna in Roma gool iska soo gudo waxaa ka dhawaa in mid 3aad laga dhaliyo iyadoo Ronaldo ku dhowaadey inuu dhaliyo goolkii 3aad hase yeeshee ay birta kaga dhacdey.

Barcelona ayaa sidoo kale lug kula jirta semifinaalha tartankan markii ay 1-0 kaga soo badiyeen kooxda Jarmalka ah ee Schalke oo aan wax fursad gool lagu dhalin karay  helan guud ahaan ciyaarta.

Goolka ay ku badisey Barcelona waxaa u dhaliyey xidiga 17 jirka ah Bojan Krkic daqiiqadii 11aad ee ciyaarta marki uu baas ka helay Henry waxeyna hada u egtahay in Barcelona ay semifinaalaha isku qaabili doonaan kooxda Man.United hadii aysan dhicin mucjiso.

Ciyaaryahanada Barcelona oo todobaadkan ay ku fooriyeen kuna oriyeen taageerayaashooda markii iyagoo 2-0 ku hogaaminaayey 3-2 ay kaga badisey Real Betis islammarkaana ay sii xumaatey rajadii ay ka qabeen hanashada horyaalka Spain ayey dadka qaar sii saadaalinayeen iney wax weyn u dhimi doonto niyada ciyaartoyda Barcelona laakiin hada waxey u muuqdaan iney dhiiragelin u noqotey maadaama ay banaanka kusoo badiyeen iyadoo weliba ay ka maqanyihiin xidigii waa weynaa ee kooxda sida Ronaldinho, Deco iyo Lionel Messi.

Caawa waxaa balansan kooxaha Arsenal vs Liverpool iyo Fernabehc vs Chelsea oo aan idiin soo gudbin doono sida ay u dhacdo hadii Alle idmo.

Asad A. Omar "afey"

deeyoo_edit@hotmail.com

 
 Halkan riix si aad deeyoo.com uga dhigato bogga hore