Sawirkani waa Abdisalan oo kubad kula dagaalaya Mascherano ciyaar dhex mareysay Liverpool iyo Manchester City.

Abdisalaan Cadaay oo 21 jir ah una ciyaara kooxda maalqabeenka ah ee Manchester City ayaa deyn ama amaah lagu siiyay kooxda hogaanka u haysa horyaalka Norway ee Strømsgodset inta ka harsan sanadkan aynu ku jirno.

Cadaay oo sanadkii hore amaah ugu maqnaa dalka Holland gaar ahaan kooxda Nijmegen ayaa isku dayay sidii uu ula qabsan lahaa kooxdan ay hareeyeen xidigo ka kala yimid dunida dacaladeeda, laakiin markuu arkay xaalka meesha yaala ayuu fursad qaali ah u arkay inuu awoodiisa kubadeed kusoo bandhigo dalka uu intiisa badan kusoo barbaaray ee Norway.

Abdisalan cadaay oo mustaqbal fiican kuleh kubada cagta ayaa lamid noqday ciyaartoyda dhalinta yar ee u ciyaara kooxaha waaweyn ee maalqabeenka ah oo inta badan door bida xidig weyn, inti ay fursad siin lahaayeen xidigaha ay iyagu soo barbaarsadaan, waana arimaha sida aadka loogu eedeeyo iyagoo qarash badan ku bixiyo soo saarida dhalinyaradan hadana iska hilmaama markii ay mirahooda guran lahaayeen.

Kooxda uu hada amaahda ugu imaanayo ayaa ah koox ay wada shaqeyn weyn kala dhexeyso Manchester City, horeyna uga faa'iideysatay fursadaan oo kale oo waxa ayba hada hogaanka u hayaan horyaalka dalka Norway oo ay u badantahay inay ku guuleystaan sanadkan, Abdisalaana kaalintiisa iyo xirfadiisa ciyaareed ku caawiyo, waxaana aad u amaanay warbaahinta Norway oo inta badan soo qoray warkan.

Xidigan dhalinyarada ah ayaa kooxda haysata horyaalka Ingiriiska ee Manchester City ka tirsanaa muddo 5 sano oo waxaa uu yimid isaga oo 16 jir ah, waxaa ku adkaatay sidii fursad ugu heli lahaa kooxdan oo inta badan soo iibsato laacibiin waaweyn oo ay ku qarash gareyso lacago aad u fara badan. sidoo kale waxa uu u ciyaaray xulka da' yarta Norway iyo weliba qaranka dalkeena Soomaaliya.

Waxaa soo diyaariyay

Mohamed Deeyoo

deeyoo_admin@hotmail.com

Oslo / Norway