Inter oo ka badisey Chelsea, CSK Mosko iyo Sevilla oo is mari waayey

25.02.2010, deeyoo.com.

Kooxda hogaanka u haysa horyaalka Talyaaniga Inter ayaa 2-1 ku dhufatay kooxda dhankeeda hogaamineysa horyaalka Ingiriisk Chelsea wejiga koowaad kulankii xiisaha badnaa ee ku dhex maray magaalada Milano.

Kulankaan oo xiisahiisa iyo ka sheekeyntiisaba bilaabataya cayaarta ka hor maadaama uu Tababate Mourinho markii ugu horeysay kasoo horjeesanayey xidigihii iyo taageerayaashii reer Chelsea oo uu mar halyey u ahaa ayuu tusay inuu weli xushmad weyn u hayo maadaama uusan u dabaaldegin markii ay Inter heshay goolkii 1aad daqiiqadii 3aad ee cayaarta.

Cayaaryahan Milito ayaa intuu kubada si wanaagsan uga farsameystay kabtanka Chelsea Terry si macaan shabaqa ugu hubsaday hogaankiina u dhiibay kooxdiisa Inter.

Chelsea ayaa bilowgii qeybtii hore heshay gool bareejo ah markii uu kubad joog hoose ah si maskaxeysan boortaha Inter u daba mariyey Salomon Kalou cayaartiina ka dhigay min hal gool hase yeeshee 4 daqiiqo ka dib goolkii Chelsea ayuu Cambiasso helay labo fursadood markii tii hore laga badbaadiyey ayuu darbadii dambe oo aad u xooganeyd shabaqa ku ruxay guushiina faraqa ugu riday kooxda Inter iyo tababare Mourinho.

Labo todobaad ka dib ayey labadan koox mar kale isku arki doonaan magaalada London markaasoo kooxdii badisa isku darka labada kulan usoo gudbi doonto querter finaalaha tartanka weyn ee Champions League oo lasii saadaalinaayo inuu noqon doono kulan aad ugu xiran mustaqbalka tababare Mourinho oo hadii uu ku guuldareysto inuu kooxdiisa guul u horseedo tartankan uu shaqadiisa weyn doono maadaama goor horeba ay Inter isku xigsatay horyaalka Talyaaniga sababta loo shaqaaleysiiyey Mourinhona ay aheyd inuu soo afjaro koob la`aanta horyaalada Yurub oo ay ka soomanaayeen 45 sano.

Kulankii 2aad ayaa caawa dhex maray kooxaha CSK Mosko iyo Sevilla oo bareejo min hal gool ah kusoo dhamaaday.

Asad A. Omar "afey"

deeyoo_edit@hotmail.com

 
 Halkan riix si aad deeyoo.com uga dhigato bogga hore

©2009  www.deeyoo.com