Isboortiga dalka Soomaaliya ayaa soo maray marxalado iyo heerar kala duwan iyadoo marna aysan eed la’aan noqonin  maamuladii kala duwanaa ee soo maray cayaarihii soomaaliya.xitaa cayaaryahanadii xiligaas.

Dhacdooyinkii isboorti ee xusuusta ku reebtay Bahweynta isboortiga dalka Soomaaliya ayaa waxaa kamid ahaa MAANTA BADI BARI JILI.

Bahweynta cayaaraha Soomaaliya ayaa waxaa ay ahaayeen kuwo si hoose ugu  war haayay habka maamul ay  wax ku wadi jireen maamulayaashii isboortiga dalka Soomaaliya. 

Waxaa dhici jiray in laga tago cayaaryahan ama cayaaryahanad laacib ama laacibad ah taasi oo ahayd dhibaato la og yahay laakin aan xalkeeda loo is taagin ama aanan wax laga qabanin.

MAANTA BADI BARI JILI .waa halheys caan baxay taasi oo ahayd xulka kooxda  Munushiibiyo oo cayaaraysay cayaarihii koobka Naadiyada Afrika  hadii ay adkaan lahaayeen kulankaas ayaa waxaa ay  u soo bixi lahaayeen  cayaaro lagu qabanayay dalka  Chile oo ku yaala Koofur Ameerika

Kooxda Muqdisho ama Dowladda Hoose ayaa waxaa ay la cayaaraysay koox ka socotay dalka Nigeria oo hadii ay ka adkaan lahaayeen ay noqonayaan kuwo ka qeyb gala cayaaro lagu qabanayay dalka Chile.

Ka Sokow ka haritaanka Kooxda Muqdisho ay ka hartay tartankaas ayaa waxaa bahweynta Soomaaliya ay isla dhexmareen in Kooxda Muqdisho aysan  Tabar la’aan ama cayaar la’aan  ugu harin  laakin ay jiraan wax yaabo kale  sida in Laaluush ay qaateen Maamulayaashii Xiriirka ama qaar kamid ah cayaartooydii Kooxda Muqdisho.

Sidoo kale waxaa bahweyntii isboorti ee Soomaliya ay xuseen in kulankii MAANTA BADI BARI CHILE ay mas’uul ka ahaayeen qaar ka tirsan cayaaryahanadii xulka Kooxda Muqdisho waxaana ay si toos ah afka ay ugu dhufteen Gool hayihii kooxdaas ee  loo yaqiinay Isaaq Max’ed Nuur (Isaaqeey).iyo mid kamid ah daafacyadii kooxdaas u Cayaarayay kulankaas oo Lagu Magacaabayay Amaan kaasi oo kamid ahaa ilaa afar cayaaryahan kuwaas oo xiriirka Soomaaliyeed ee Kubadda Cagta xiligaas ay sheegeen in ay ku xoojinayaan kooxda Munishiibiyo si ay ugu adkaato kooxda ka socotay dalka Nigeria.

Cayaartii  lugta 1-aad ee dhexmaray kooxda Ka socotay dalka Nigeria iyo Munishiibiyo oo ka dhacday dalka Nigeria ayaa ku soo dhamaatay 0-0 waliba waxaa kooxda Munishiibiyo kulankaas u cayaarayay cayaartooydeeda oo kaliya kuma jirin xidig looga soo  daray kooxihii ka jiray dalka Soomaaliya.

Cayaartii Lugtii 2-aad ee dhexmaray kooxda Ka socotay dalka Nigeria iyo Munishiibiyo taasi oo ka dhacday Magaalada Muqdisho ayaa waxaa lagu soo daray Munishiibiyo  ilaa afar cayaartooy kuwaas oo uu kamid ahaa Aamaan oo ahaa daafacii kooxda Badroolka iyo Cambar Qamiis oo ahaa xidigii qadka dhexe ee kooxda Waxool kaasi oo haatan ku nool Magaalada Neyroobi ee dalka Keenya iyo Labo  xidig oo kale .

Kulankaan Maanta Badi Bari Jili waxaa kooxda Munishiibiyo looga badiyay 1-0 oo ay guusha ku raacday kooxda ka socotay dalka Nigeria waxana goolka uu ahaa mid ay iska dhaliyeen kooxda Munishiibiyo waliba waxaa dhaliyay Cayaaryahan Aamaan oo u cayaarayay kooxda Badroolka laakin si kumeel gaar ah uu xiriirka Soomaaliyeed uu sheegay in uu ku xoojinaayo xulka Munishiibiyo maadaama kulankaan uu yahay mid muhiim u ah Soomaaliya.

Xudunta Shakiga ee Bahweynta Isboorti ayaa timid kadib goolka ay iska dhaliyeen Munishiibiyo waliba uu ahaa mid uu saxiixay mid kamid ah cayaartooydii lagu sheegay in ay yihiin kuwo xoojin ah waxana dhaliyay Aamaan oo si wanaagsan u dib dhaafiyay Gool Haye Isaaq Max’ed Nuur ISAAQEEY. 

Inkastoo waayo joogii  cayaaraha Soomaliya ay hoosta ka xariiqeen in la gacan Bidixeeyay kulankaas Taageerayaashii kubadda cagta Soomaliya sida weyn u taageeri jiray ayaa waxaa ay sheegeen in masuq maasuq cayaareed ay dhacday isla markaana ay mas’uul ka yihiin Maamulayaashii iyo cayaartooydii Soomaaliyeed kuwaas oo qaatay lacago ama wax ay ku sheegeen LAALUUSH.

Hadaba dadkii la xusay ayaa waxaa kamid ahaa Alaha u Naxariisto Aabihii isboorti,Halyeygii isboorti ,Geesigii isboorti ee Soomaaliya Faarax Wehliye Cadoow Janaqoow oo ku caan ahaa magaca FAARAX SINDIKO laakin qormadaan ma jecli in aan ku sii dheeraado dhaliishii ama eedii ay u soo jeediyeen Taageerayaashii iyo waayo joogii isboorti maadaama uu geeriyooday kaliya waxaan leenahay Alaha u naxariisto.

Sidoo kale waxay eedeenta ay u soo jeediyeen Gool Hayihii kooxda Munishiibiyo oo isna ay ku tilmaameen mid aanan si wanaagsan u qabanin kubaddii Otoreetada ee Aamaan u soo baasay waxaana ay sheegen in uu u dhaqaaqay meeshii kubada loo baasay meel aanan ahayn isagoo ay ka dhalatay kubadaas isla markaana ay soo gabo gaboowday MAANTA BADI BARI JILI oo looga adkaaday 1-0.

inkastoo loo soo jeediyay eedaas  Gool hayihii kooxda Munishiibiyo Isaaq Max’ed Nuur ISAAQEEY waa MARXUUM ku geeriyooday dagaaladii sokeeye ee ka dhacay dalkeena Soomaaliya sidoo kale mana jecli in aan ku sii dheeraado walaalkeena qaaliga ahaa ee gool hayihii kooxda Muqdisho oo ahayd Naadi Caasimadda Soomaaliya matalaysay Isaaqeey waxaana leenahay Alaha u naxariisto.

Isaaq Max’ed Nuur Isaaqeey ayaa u geeriyooday dhaawac xabadeed kadib markii ay ku fakatay xabad Bistoolad isagoo joogay Magaalada Baladweyne ee Gobolka Hiiraan oo uu kasoo jeeda xidigaan isagoo sababsaday gacanta nin ay saaxiibo ahayeen oo ay xabada kaga fakatay.

Hadaba si aan wax badan ugu sii ogaano waxa ka jira dhaleeceenta ku aadan in Munishiibiyo aysan ku harin Cayaar looga badiyay Balse  ay ku hareen hagar daamo qorsheysan oo ka dhan ah Naadiga Muqdisho.

Maxaa ka jira in Garsoorayaashii kulankaas ay Weydiisteen Lacago Laaluush oo XAARAAN ah Maamulkii kooxda Munishiibiyo ?

Si aan wax badan ugu ogaado arrintaan ayaa wax ka weydiiyay shaqsi ku dhowaa kooxda Munishiibiyo Maamulkeeda laakin aanan ku soo bandhigeeynin Magaciisa Qormadaan  waxaana uu ii xaqiijiyay in ay jirto arrintaas ah in ay lacag ay weydiisteen waliba si dadban ay u weydiiyeen kadibna loo gudbiyay Duqa Magaalada Muqdisho ee xiligaas Xasan Abshir isagana  uu ogolaaday laakin uu is hortaagay Marxuum Sindiko oo sheegay in aysan u baahneyn cayaartaan in lacag la bixiyo isla markaana ay ka adkaan karaan kooxda reer Nigeria.

Taageerayaashii kooxda Munishiibiyo ayaa sheegay in ay ahayd mid kamid ah Shirqoolada loo dhigay kooxda Muqdisho isla markaana ay ku dhaceen waxaana ay sheegeen in ay noqotay  mid aysan waligood ilaawi doonin.

Si kastaba kubada cagta Soomaaliya ayaanan ka bixin waligeed dhibaato, Eed,Is qab qabsi,Laaluush,Nin Jecleysi iyo Masuq Maasuq.