Drogba oo ku baashaalay Arsenal una horseeday kooxdiisa iney soo ceshtaan hogaanka horyaalka

Drogba

07.02.2010, deeyoo.com.

Didier Drogba ayaa dhaliyey labada gool ee Chelsea markii ay 2-0 ku garaaceen kooxda ay isku magaalada ka dhisan yihiin ee Arsenal kulankii adkaa ee maanta ku dhex maray garoonka Chelsea ee Stamford Bridge.

Drogba oo inta badan ay u saaran tahay marka uu la cayaarayo Arsenal ayaa kulankaan ka hor 10 gool ka dhaliyey Arsenal 9kii kulan ee ugu dambeysay isagoo mar kale noqday farqiga u dhexeeya labada koox qal qal iyo isku dhex yaacna geliyey difaacii Arsenal.

Kabtanka Chelsea John Terry oo maalmahaan saxaafada aad u hadal hayeen fadeexadii gogol dhaafka ee jaceylkii hore ee Weyne Bridge oo qaranka iyo kooxda Chelsea kawada tirsanaayeen si gooni ahna saaxiib aad isugu dhow u ahaayeen ayaa koorno lasoo gamay madax ugu sii gudbiyey Drogba oo si fudud shabaqa ugu luxay daqiiqadii 8aad ee bilowgii cayaarta.

Drogba ayaa mar kale shabaqa la helay goolkii 2aad ee cayaarta rubi saac ka dib goolkii hore markii ay Arsenal ku fashilantay iney dhaliyaan gool bareejo ah ka dib weeraro culus oo ay kusoo qaadeen goolka Chelsea, xidigaha Chelsea ayaa weerar koontaro ah kasoo bilaabay afka goolkooda ayuu ugu dambeyn Frank Lampard baas usoo dhigay Drogba oo intuu kubada ka farsameyso dhowr daafaca Arsenal si maskaxeysan u daba mariyey boortaha Arsenal.

Drogba oo kulankaan ahaa xidigii garoonka ayaa aad ugu dhowaa inuu dhaliyo goolkiisa 3aad markii uu birta ku dhuftay boliziyoone uu kasoo gamay qiyaastii 20 mitir meel u jirta goolka Arsenal hase yeeshee labada ayaa ku filnaatay Chelsea iney dib ula wareegto hogaanka horyaalka oo Manchester United si kumeel gaar ah usii heysay markii ay 5-0 ku duugeen kooxda Portsmouth oo iska dhalisay 3 ka  mid ah goolasha halka labada kale ay kala dhaliyeen xidiga hogaanka u haya tartanka gool dhalinta Weyne Rooney iyo Berbatov.

Guuldaradaan ayaa u eg in ay banaanka ka dhigtay Arsenal loolanka loogu jiro hanashada horyaalka iyadoo Arbacada ay isku dhegan yihiin kooxda Liverpool oo hadii aysan badin toos uu tareenka uga tagaayo inkastoo macalinka Arsenal Wenger diiday inuu ka rajo dhigo horyaalka isagoo mar kale ku celiyey in kooxaha ka horeeya ay mar kale dhibco lumin karaan kulamada soo socda.

Kala horeynta kooxaha:

deeyoo_edit@hotmail.com

 
 Halkan riix si aad deeyoo.com uga dhigato bogga hore

©2009  www.deeyoo.com